BASANAN YANG BIASA DIBAWA GANDRUNG TEMPO DULU SEWAKTU MENYANYI PADA BABAK PAJU GANDRUNG

 
Dicatat oleh: Fatrah Abal
 
Lengo wangi botole biru
Ana kampak ring stapsiun
Raino bengi sing biso turu
Riko kapak awak isun
 
Wader petaj jurang jero
Ana cino nganggo capil
Kemetak arep rabi loro
Sedinane magih epil-epil
 
Kelap-kelip damare lincing
Tegal wero wono rekso
Sing biso nyalip dudu lancing
Sing bias nggowo dudu menungso
 
Ijo-ijo godong kemuning
Howo Cantuk seru ademe
Sing ana jodo kelendi maning
Wis kepetuk pada demene
 
Sawah rika sebahu setengah
Hang setengah ditanduri bako
Salah riko nuruti pitnah
Hang mitnah arepe nganggo
 
Piro-piro beras kopine
Telung karung sun kateni
Piro-piro welas atine
Telung tahun sun anteni
 
Kemelinting abane gelang
Janur kudup disilir angin
Semaya penting ditinggal ngilang
Seumur hidup gedigu bain
 
Gunung kulon kabare muni
Beras ketan dicampur roti
Omong guyon ditemenani
Apik lesan satru ring ati
 
Abang-abang kembang rambutan
Timbang mulih bangur nyang sawah
Timbang-timbang dienggo rebutan
Kadung sing olih bangur ngalah
 
Ali-ali ilang matane
Patrekno nyang Singojuruh
Ojolali nyang semayane
Antekna teka buruh
 
 Lintang kerep lintang kerti
Undur-undur ana ring wangan
Duwe karep pumpung saiki
Mundur-mundur selak larang pangan
 
Panase nyang latar Cungking
Ademe nyang lurung Kemiren
Welase wis keliwat sangking
Demene wis sakat bengen
 
Nyang Kuto sun darati
Ono Cino ring Kaotan
Olih riko sun niati
Sing gaduk sedino, sak lautan
 
Nonton gandrung udan-udan
Nong Kedaleman ngundang barong
Ati bingung kaya wong edan
Duwe demenan digawa uwong
 
Klambi abang terasna
Tuku mesin nang langganane
Wis obang terusno
Magne sing isin nyang tanggane
 
Kuning-kuning empike nongko
Kembang peciring dijejer lima
Klendi maning apik nyang rika
Isun iring nyang karep rika
 
Pasar kuto Banyuwangi
Nolih mego katon langite
Katon rika raina bengi
Nolih sega seru paite
 
Ring Karangsari ana barong
Agustus nggawe gapuro
Durung ditari wis ngomong-ngomong
Kadung wis putus arep digawa
 
Ana surat teka ring kuto
Tuku sandal ring Rogojampi
Ana liwat katon ring mata
Semendal rasane ati
 
Ana wak aji buruh ndaut
Sun takoni mantuk-mantuk
Awak siji direbut-rebut
Sun lakoni nawi sing tutug
 
Kusir-kusir kusire lurung
Rujak nanas ring pelonco
Rika ngesir aja katik wurung
Atine panas dilogoh kanca
 
Ana paran rika nyang Bali
Yo nong gunung metik rantine
Ana paran mbelani hang kari
Yo hang sulung apik atine
 
Ana cina ngumbe limun
Tegalwero yoro Wonorekso
Sing katon sedina kaya setaun
Sing bias nggawa dudu menungsa
 
Tuku cingkir keciliken
Klambi katun setalian
Duwe pikir wolak waliken
Nawi getun dina nburian
 
Ring Kalibaru nggowo Rambutan
Sun takoni ulihe njaluk
Buru-buru dienggo rebutan
Dilakoni nawi sing tutug
 
Klambi putih lepitana
Ana opas ngempit buku
Nawi mulih pamitana
Magne epas rika melaku
 
Biru-biru godonge manggis
Jeruk purut nyang gilingan
Buru-buru omonge manis
Serta diturut yoro bajingan
 
Klambi cemeng sruwal cemeng
Dikumbah mosok lunturo
Mak sing seneng bapak sing seneng
Dicegah mosok munduro
 
Nonton biskup lakone tarsan
Nyang Ketapang melaku dewek
Kapan sanggup hang mesisan
Gena gampang marah wong tuwek
 
Dodolan wedang yoro gondoruwo
Hang nukoni yoro bantongan
Riko sun adang terus sun gowo
Sun lakoni kawin colongan
 
Ana etuk ya ana semat
Jangan terong sambele ranti
Kepetuk kari nikmat
Kaya bolong rasane ati
 
Ring Singojuruh kantor kecamatan
Nyang Tembakon nyambang sawahe
Isun wis weruh rika arep pegatan
Milu takon paran salahe
 
 Ring Majarata ana lumba desa
Pager-pager pada dilabur
Atinisun lara rika gudo
Angger-angger rika ngelara ati
 
Ring Singojuruh akeh umah gedong
Pagerane ana letere
Isun weruh rika duwene uwong
Pelanggeran pada pentere
 
Pitik lorik mati dibombong
Pitik cemeng mati tablukan
Aja ngelirik duwene uong
Nuruti seneng mati sudukan
 
Biru-biru godonge manggis
Jeruk purut dienggo gemparan
Buru-buru omonge manis
Serta diturut sing paran-paran
 
Damare karia barak
Mulane barak akeh lengane
Perawane karia galak
Mulane gala kana lancinge
 
Klambi cemeng rika sulami
Disulami ring ngarepe bale
Nuruti seneng aja didandani
Didandani seje han duwe
 
Klambi ijo diwani bakale
Ilekna kedung hang santer
Kadung sing jodo klendi akale
Golekna dukun hang pinter
 
Ngrujak jeruk ragi ketumbar
Klapa gendeng sapa hang duwe
Awak gendrung praenan jembar
Andeng-andeng ngisore lambe
 
Ngeletik rika ulihe nyolong
Sapu keduk rika balekna
Rika apik paran hang kalong
Sekira gadug sun balekna
 
Ngeliwet berase karon
Ketan cemeng ditandur ring sawah
Kaya enget ngomong keloron
Mati bareng kersane Allah
Aside | This entry was posted in Uncategorized. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s