LAGU-LAGU BANYUWANGEN

Lirik-lirik lagu Banyuwangi yang saya ciptakan:

 

ANGEN-ANGENE WONG TUWEK

Oleh: Fatrah ABAL

 

Pontang-panting wong tuweke … Eman

Sedina-dina sing na putuse

Nggolek  sandang lan pangane …Eman

Bukti asih nyang anake

 

Angen-angen wong tuweke …Eman

Nyawang anak ring dina mburine

Dadi wong seneng uripe … Eman

Jujur apik tingkah polahe

 

Ref;      Wong tuwek tentrem atine

Nyawang anak seneng uripe

Wong tuwek nelangsa  bathine

Nyawang anak rusak uripe

 

Lare lare ilingana ..Eman

Prihatin mbantu wong tuweke

Sitik akeh pada nrimane ..Eman

Mugo-mugo olih sawabe

 

 

TULI-TULIO  –  Oleh  Fatrah Abal

 

Tuli-tulio kang riko nong dalan

Akeh tunggangan pating sliweran

Yo pilih-piliho nggolet demenan

Akeh wong wadon hang ayu pulasan

 

Tuli-tuliho dik hang ati-ati

Aja sampik rika keneng diapusi

Ya pilih piliha wong nggolet laki

Akeh wong lanang demen nyeleceki

 

Ref;      Aluk waspada rika timbang sembrana

Laki rabi sing mong sedina rong dina

Ukurane dudu emas raja brana

Mong welas asih rika den timbangana

 

 

 

TETAK-TETAK

Oleh:  Fatrah –  Abal

 

Tak  tetak tetak tetak

Tetak-‘a  si lencir kuning

Edeng-edeng terus sun gandeng

Gaduk bucu baliko maning

 

Tak tetak tetak tetak

Ja males ya adik isun

Aja sira ya wedi tiba

Ayo sun ering lan sun tuntun

 

Ref;      Edeng-edeng ya terus sun gandeng

Putar puter gena gelis pinter

Lan mengarep sawangen temenan

Katon padang yo sunare paran

 

Cang gancang yohang gancang

Mak bapake hang nyawang

Aja katik ya selaperan

Gena gelis gaduk tujuan

 

 

GELANG – ALIT

Oleh:  Fatrah Abal

 

Wis kelakon sak mene lawase               Mandanea ya senenge ati

Isun ya rika kedani                                Ketemu ring dina mburi

Semono sun imbangi                             Gelang alit ring deriji

Mula rika kudangane ati                        Aja lali tumekane pati

 

Segara ya ana pesisire

Sun welas nana watese

Wedang kopi belong nangka

Raina bengi y among katon rika

 

Ref;      Ya  wis kelendi maning

Saiki sewang-sewangan

Kepingin kumpul maning

Tapi nana dalane …Eman

 

 

 

WELAS – ASIH

 Oleh:  Fatrah  Abal

 

Wis ping pira sing sun engeti

Teka bareng ambi kembange ati

Padang ulan ring pesisir Banyuwangi

Alame tentrem katon asri

Lungguh jejer ambi gesah

Kaya wing sing ana aran susah

Lintang ulane disawang sing mboseni

Nggawe asih sayan kepatri

 

Ref;      Kesilir angin krasa adem

Sun dipeluk ambi mesem

Pikiran munting dadi tentrem

Kadung wis jodo ati tentrem

Suling pabrik semengung muni

Tanda bengi wis keliwat wengi

Njingkat bareng haya-kaya sungkan mulih

Kadung ati  wis keliwat asih

 

 

 OJO NANGIS

 Oleh:  Fatrah  Abal

 

Wis menengo ayo menenga

Aja nangis ayo menenga

Sira nangis ya ilang ayune

Kadung meneng ya katon manise

\           Ya menenga ya kesirepa

Aja nangis yara merema

Nangis-nangis ya ana paran

Nana leak sing ana paran

 

Ref;      Aja tingkah ayo sun ayun

Kesirepa ring ayun-ayun

Ambi turu sun ayun-ayun

Aduh eman ya anak isun

Wis menenga ayo menenga

Lare ayu anake sapa

Beduk subuh gage tangia

Nyang Pengran ya pada ndonga-a

 

 

TEMU KANGEN

 Oleh: Fatrah  Abal

 

Osing saben tahun bisa ketemu

Malah ana hang puluhan tahun

Ambi kanca sekolah lan kanca memengan

Waktu magih cilik kumpul bebarengan

 

Sak wise lebaran ana undangan

Temu kangen lan halal bi halal

Serta wis pada teka salam-salaman

Salah lan lupute pada disepura

 

Ref       Ana hang teka lali nyang kancane

Sekala enget kontan peluk-pelukan

Mbeseseg eluh mili sangking senenge

Lawas sing ketemu sing weruh kabare

 

Muga tahun ngarep nana alangan

Pnjang umur lan ketemu maning

Adoh-adohan pada ngemban kewajiban

Tapi sing lali nang papan kelahiran

 

 

KEPIKIRAN

 Oleh: Fatrah  Abal

 

Ojo takon sapa hang salah

Sun lan rika sewang-sewangan

Telung tahun ulihe demenan

Umah-umah gok sing nemu dalan

 

Rika ngenes isun nelangsa

Yaw is kadung pada abote

Isun ihlas rika nyan ding liya

Tapi ati ya kepulasara

 

Ref       Gedigi nasib isun lan rika

Arep tingkah wed iambi dusa

Wong tuwek uwis nompo lamaran

Isun lan rika arep bisa paran

 

Wis rong tahun adoh-adohan

Seperene isun dewekan

Bolak-balik digudo demenan

Eling rika lemes kepikiran

 

JODO SING  ONO

 Oleh: Fatrah Abal

 

Yoro riko hang isun pikiri

Mulo riko hang isun katoni

Lan mong riko hang isun angeni

Raina bengi uga sun kedani

 

Bolak-balik wis isun omongi

Kadung rika hang isun aboti

Kari suwe rika sing mbalesi

Tangise ati riko anggep sepi

 

Ref       Awak kelantur kelara-lara

Suwe nganteni awak kepula sara

Sampik lali nyang werane dunya

Nggolet liya indane tah sing bisa

 

Serta isun di sanding wong liya

Riko ngomong pasrah lan nerima

Wis kasep rika aja ngersula

Wis tulise kadung jodo sing ana

 

 

NGGOLEK  ILMU

 Oleh: Fatrah Abal

 

Di susoni yo didulang

Di gendong di iyong-iyong

Mari merangkang terus melaku

Gede maning wis nyangking buku

 

Hang pateng nggolete ilmu

Liya dina keneng ditemu

Rungokena omonge guru

Wong tuwek hang nguwani sangu

 

Ref;      Nggolet ilmu nyang endi bain

Nggolet ilmu nono watese

Pari basan nyang pucuke langit

Nyang njero bumi nyang duwure ombah

 

Ojo pati mangu-mangu

Nggarai sing bisa maju

Nasibe bangsa nyang tangan ira

Bu Pertiwi wis suwe nelangsa

 

 

OJO MOLAK-MALIK

 Oleh: Fatrah Abal

 

Hang cilil pada nyelempit

Hang gede sayan ngelangit

Wis biasa ana gede cilik

Tapi dohno aran penyakit

 

Hang gede jo malang kerik

Hang cilik jo gampang ngerik

Pada dipikir kelendi hang apik

Laku olo pada ditampik

 

Ref;      Hang gede nggapea hang cilik

Uripe gena sing tambah werit

Kadung ngomong ojo molak malik

Nggawe ati nggarai mengkirig

 

Hang gede uga hang cilik

aja nduwe ati hang borik

Lan sing gampang di elik-elik

Urip tentrem sing lerak-lirik

 

 

CEMENG MANGGIS

Oleh:. Fatrah Abal

 

Manise yo manise

Cemenge cemeng manggis

Disawang sing mboseni

Nyawang sepisan yo ngangeni

 

Lancinge pada ngelamun

Hang dilamun membat mayun

Gregeten  arep metik

Hang di karep nguwani unyik

 

Ref;      Aduh-aduh hang cemeng manggis

Kenal sepisan ati ketepis

Mrana mrene lancinge nyopo

Prawan ayu mula anake sapa

 

Guyu lan eseme

Gelantongan nyang lambene

Duh eman tambah manis

Hang sing krehes pada meringis

This entry was posted in Uncategorized. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s